مەملەكەت باسشىسى WBC, WBA (Super), IBO تۇجىرىمدارى بويىنشا كاسىپقويلار اراسىنداعى بوكستان الەم چەمپيونى گەننادي گولوۆكينمەن كەزدەستى, دەپ حابارلايدى اقوردانىڭ ءباسپاسوز قىزمەتى.
ەلباسى كەزدەسۋ بارىسىندا بوكستان الەم چەمپيونى گەننادي گولوۆكينگە ءىلتيپات ءبىلدىرىپ, قازاقستاندىقتار ونىڭ كاسىبي سپورتتاعى جارقىن جەتىستىكتەرىن ماقتان تۇتاتىنىن ايتتى.
– وتانداستارىمىز سەنىڭ جەكپە-جەكتەرىڭدى ءجىتى باقىلاپ وتىرادى. سەن قازاقستاندى لايىقتى تۇردە تانىتىپ, ءوز وتانىڭدى ەشقاشان ۇمىتپاي, جۇرگەن جەردە ايتىپ جۇرەسىڭ. ءبىز سەنى ماقتان تۇتامىز. قىركۇيەك ايىندا سەنى وتە ماڭىزدى جەكپە-جەك كۇتىپ تۇر. بارشا قازاقستاندىقتاردىڭ اتىنان ساعان جەڭىس تىلەيمىن, – دەدى قازاقستان پرەزيدەنتى.
نۇرسۇلتان نازارباەۆ گەننادي گولوۆكيننىڭ قازاقستان سپورتىن تانىتۋداعى جانە ەلىمىزدىڭ حالىقارالىق ءيميدجىن ارتتىرۋداعى زور ءرولىن اتاپ ءوتتى.
– سەن ءوز سالماعىڭدا ەشكىمگە دەس بەرمەدىڭ, ساعان جەڭىلىس تاپپاعان ەڭ ۇزدىك نوكاۋتەر بوكسشى دەگەن اتاق بەرىلدى. بۇل – زور جەتىستىك ءارى ءبىزدىڭ سپورتىمىز بەن بۇكىل قازاقستاندى ناسيحاتتاۋدىڭ جارقىن مىسالى. ءبىز سەنىڭ ەرىك-جىگەرىڭدى جوعارى باعالايمىز. ەگەر قازاقستاندا جەكپە-جەك وتكىزۋگە مۇمكىندىك بولسا, ءبىز وعان جاعداي جاساپ, قول ۇشىن بەرەمىز, – دەدى مەملەكەت باسشىسى.
گ.گولوۆكين جەكە قولداۋ كورسەتكەنى ءۇشىن جانە قازاقستاننىڭ سپورتىن, سونىڭ ىشىندە بوكس مەكتەبىن دامىتۋعا زور كوڭىل بولگەنى ءۇشىن نۇرسۇلتان نازارباەۆقا العىس ءبىلدىردى.
– مەن ءوز تاراپىمنان ەلىمىزدى حالىقارالىق ارەنادا ودان ءارى تانىتۋ ءۇشىن بار كۇش-جىگەرىمدى جۇمسايمىن. ەگەر ءبارى ويداعىداي بولىپ جاتسا, قازاقستاندا جەكپە-جەك وتكىزۋ جوسپارىمىزدا بار. حالقىمىز وسىنداي ايتۋلى وقيعانى تاماشالاۋعا ابدەن لايىق دەپ ەسەپتەيمىن. ماڭىزى زور وسىنداي جەكپە-جەكتى بارشا جۇرت كورگىسى كەلەدى دەگەن ويدامىن, – دەدى گ.گولوۆكين.
سونىمەن قاتار بوكسشى قازاقستان پرەزيدەنتىنە WBC, WBA (Super), IBO جانە IBF تۇجىرىمدارى بويىنشا كاسىپقويلار اراسىندا بوكستان العان چەمپيوندىق بەلدىكتەرىن سىيعا تارتتى.
سوڭىندا نۇرسۇلتان نازارباەۆ گ.گولوۆكيندى «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنىمەن ماراپاتتادى.